فتحت متجر على منصة سلة، واخترت منتج رهيب، رتّبت المنتجات، رفعت الصور وكل شيء ممتاز..

بدأت بالاعلانات ولكن فجأة تلاحظ شي غريب:

الناس تدخل، تتفرج، وتطلع.

ما في مبيعات.

تسأل نفسك: وش المشكلة؟ المنتجات ممتازة والتصميم ممتاز!

المشكلة هي (المحتوى النصي)

الوصف، العناوين، التعليمات، وحتى الزر اللي مكتوب عليه أضف للسلة

المحتوى النصي هو البديل للبائع في المتاجر الالكترونية, تخيل تفتح محل بدون بائعين!

الكلام اللي تكتبه داخل متجرك هو اللي يشرح، يحمّس، ويقنع الزبون يشتري.

اكون صريح وواضح معك حتى لو كنت تستخدم أفضل ثيمات سلة، أو تعاونت مع مصمّم خبير في منصة سلة، إذا المحتوى ناقص أو ممل؟ بتخسر الزبون قبل لا يوصل زر الدفع.

وش يسوي المحتوى النصي الممتاز؟

1. يبني ثقة:

لما تشرح منتجك بأسلوب واضح وبسيط، الزبون يحس إنك فاهم وش تبيع.

2. يزيد المبيعات:

وصف المنتج المقنع يرد على أسئلة الزبون قبل لا يسألها، ويقلل تردده.

3. يخدم التصميم:

المصمم مهما كان شاطر، إذا النصوص مبهمة، التصميم ما يقدر يشتغل لحاله.

تخيّل ثيم من ثيمات سلة مصمّم بدقة، بس العنوان مكتوب: منتج رائع. وش يعني؟ رائع بأي طريقة؟

الزبون ما يشتري إذا كان محتار

الزبون يقرأ؟ نعم، يقرأ!

وإذا ما فهم وش بيشتري، أو ما حس إنه مناسب له، بيطلع.

يعني بيرتفع عندك معدل الارتداد وينخفض معدل التحويل، وبالتالي تنخفض المبيعات.

نصيحة سريعة:

جرب تراجع وصف منتجك المفضل في المتجر.

اسأل نفسك:

• هل يشرح المنتج بشكل كافي؟

• هل يحمسني اشتري؟

• هل فيه عبارات تساعدني أتخيل كيف أستخدمه؟

إذا الجواب “لا” في أي وحدة، عندك فرصة تحسّن النص وتكسب مبيعات أكثر.

خلاصة الكلام:

إذا كنت مصمم متاجر أو صاحب متجر على منصة سلة، لا تهمل المحتوى النصي.

هو مو بس مكمل للتصميم، هو جزء منه.

واحرص دايمًا يكون واضح، بسيط، ويدفع الزبون للضغط على أضف للسلة بثقة